ସମ୍ବଲପୁରରେ ସୈନିକସ୍କୁଲ୍
ସମ୍ବଲପୁର-ଝାରସୁଗୁଡ଼ା ଅଂଚଳରେ ଆଇ.ଆଇ.ଏମ୍. ପ୍ରତିଷ୍ଠା ପ୍ରସଙ୍ଗରେ ସେହି ଅଂଚଳବାସୀଙ୍କୁ ପ୍ରତାରିତ କରିଥିବା ନେଇ ସମ୍ଭବତଃ ରାଜ୍ୟ ସରକାର ଅନୁଭବ କରି ସାରିଛନ୍ତି । ବିଶେଷତଃ ନୂଆଦିଲ୍ଲୀରେ କେନ୍ଦ୍ର ଉଚ୍ଚଶିକ୍ଷା ବିଭାଗରେ ବସିଥିବା ମହାନ୍ତି ନାମକ ଜଣେ ବରିଷ୍ଠ ଅଧିକାରୀ ବଦ୍ମାସୀ କରି ଯେଭଳି ଭୁବନେଶ୍ୱରରେ ଆଇଆଇଏମ୍ ପ୍ରତିଷ୍ଠାର ଫିକର କଲେ, ତାହାକୁ ଇତିହାସ କେବେ ହେଲେ କ୍ଷମା ଦେବ ନାହିଁ । ତେବେ ଲଢ଼ିବା ଓ ଦାବି ହାସଲ କରିବାର ମଧ୍ୟ ଏକ ସମୟ ଆଧାରିତ ମୂଲ୍ୟ ଅଛି ।
ଓଡ଼ିଶା ମୁକ୍ତ ବିଶ୍ୱବିଦ୍ୟାଳୟ ସମ୍ବଲପୁରରେ ପ୍ରତିଷ୍ଠା ହେବା ପାଇଁ ସିଦ୍ଧାନ୍ତ ହୋଇ ସାରିଛି । ଆଜି ବିଧାନସଭାରେ ଉପସ୍ଥାପିତ ବଜେଟରେ ସମ୍ବଲପୁରରେ ରାଜ୍ୟର ଦ୍ୱିତୀୟ ସୈନିକ ସ୍କୁଲ୍ ପ୍ରତିଷ୍ଠା ପାଇଁ ଘୋଷଣା ହୋଇଅଛି । ଅର୍ଥାତ୍ କେଉଁଠି ଏହି ଅନୁଷ୍ଠାନ ଦୁଇଟି ହେବ ତାହା ଉପରେ ସ୍ଥାନୀୟ ଆର୍.ଡି.ସି. ଓ ଜିଲ୍ଳାପାଳଙ୍କ ସହ ବିଧାୟକମାନେ ମୁଣ୍ଡ ଖେଳାଇବା ସହ ତୁରନ୍ତ କାମ ଆରମ୍ଭ କରିଦେବା ଦରକାର । ମନେରଖିବାକୁ ହେବ ଯେ ଏପ୍ରିଲ ମାସରୁ ଶିକ୍ଷାବର୍ଷ ଆରମ୍ଭ ହୁଏ । ଯଦି ଅସ୍ଥାୟୀ କୋଠା ଓ ହତା ଧାର୍ଯ୍ୟ ହୋଇ ନପାରିବ, ତେବେ ଏହା ୨୦୧୬ ଏପ୍ରିଲକୁ ଘୁଂଚିଯିବ । ଆମେ କ’ଣ ସତରେ ଏୟା ଚାହୁଁଛେ?
ସୈନିକ ସ୍କୁଲ୍ ହେବା ଦ୍ୱାରା ପଶ୍ଚିମ ଓଡ଼ିଶାର ବହୁ ସଂଖ୍ୟାରେ ମେଧାବୀ ବିଦ୍ୟାର୍ଥୀ ଜଣେ ଜଣେ ଜାତୀୟ ସ୍ତରର ବ୍ୟକ୍ତିତ୍ୱ ଭାବରେ ଉଭା ହୋଇ ପାରିବେ । ଯଦିଓ ଜୱାହରଲାଲ୍ ନେହରୁ ବିଶ୍ୱବିଦ୍ୟାଳୟରେ ପଶ୍ଚିମ ଓଡ଼ିଶାର ବିଦ୍ୟାର୍ଥୀମାନଙ୍କ ପାଇଁ ସଂରକ୍ଷଣ ବ୍ୟବସ୍ଥା ଥିବାରୁ ଆଜି ସେହି ଅଂଚଳର ଅନେକ ବ୍ୟକ୍ତି ଜାତୀୟ, ଅର୍ନ୍ତଜାତୀୟ ସ୍ତରରେ ପ୍ରତିଷ୍ଠିତ ହୋଇପାରିଛନ୍ତି । ଏହାକୁ ଆହୁରି ଆଗକୁ ନେଇ ପାରିଲେ, ପୂର୍ବ-ପଶ୍ଚିମ ବିଭେଦକୁ ଦୂର କରାଯାଇପାରିବ ।
ବିମଳପ୍ରସାଦ, କଥା ହୁଅନ୍ତୁ: ୯୯୩୭୩୫୩୨୯୩
ମନ୍ତବ୍ୟଗୁଡିକ