କାହିଁକି ବିଗିଡ଼ିବ ଆହାର ଯୋଜନା?
୧. ଗତାନୁଗତିକ ଢଙ୍ଗରେ ରାଜ୍ୟସରକାର ଏହି ଅନ୍ନଛତର କାର୍ଯ୍ୟକ୍ରମର କୌଣସି ମାର୍ଗଦର୍ଶିକା ଏଯାଏଁ ଜାରି କରି ନାହାନ୍ତି । ତେଣୁ ଏହା ସମ୍ଭବତଃ କୌଣସି ବିଭାଗୀୟ ଶାସନସଚିବଙ୍କ ଇଂଲିଶ୍ ଚିଠି ବଳରେ କାର୍ଯ୍ୟକାରୀ ହେବ ।
୨. ସରକାରଙ୍କର ଦମ୍ ଅଛି ତ ଓଡ଼ିଆରେ ଗେଜେଟ୍ ପ୍ରକାଶ କରନ୍ତୁ ।
୩. ପ୍ରାଥମିକ ବିଦ୍ୟାଳୟର ମଧ୍ୟାହ୍ଣଭୋଜନ ପାଇଁ ରୋଷେଇଘର ସମସ୍ୟା ବେଶ୍ ଆଲୋଚିତ ହେଉଥିବା ବେଳେ ମାର୍ଗଦର୍ଶିକା ବା ଗାଇଡ଼ଲାଇନ୍ ବାହାରିଥିଲେ ହୁଏତ, ରୋଷେଇଘର ଓ ପରିଚ୍ଛନ୍ନତା ପ୍ରସଙ୍ଗ ସ୍ପଷ୍ଟ ହୋଇ ଯାଇଥାଆନ୍ତା ।
୪. ଅନ୍ନଛତ୍ରରେ ଲୋକେ ଷ୍ଟାଇଲ୍ରେ ଠିଆ ହୋଇ ଖାଇବେ କି ବସିକରି ଖାଇବେ? ସହରୀ ଲୋକଙ୍କର ଠିଆ ହୋଇ ଖାଇବାର ଅଭ୍ୟାସ ଅଛି । ହେଲେ ଗାଆଁରୁ ଆସିଥିବା ଲୋକେ ତଥା ବସ୍ତିବାସିନ୍ଦାମାନେ ଠିଆ ହୋଇ ଖାଇବାରେ ଅସୁବିଧାରେ ପଡ଼ି ପାରନ୍ତି । ନଚେତ୍ ପଲିଥିନ୍ରେ ପ୍ୟାକ୍ କରି ଅଥବା ଟିଫିନ୍ କ୍ୟାରିଅରରେ ଘରକୁ ନେଇଯିବେ ।
୫. ଶୁଦ୍ଧ ପିଇବା ପାଣି, ଆଉ ଏକ ବଡ଼ କଣ୍ଟା । ଏ ଦାରୁଣ ଗିରିଷମ କାଳରେ ସରକାର ମାହାପୁରୁ କ'ଣ ଭଲ ପିଇବା ପାଣି ଟୋପେ ଦେଇ ପାରିବେ?
୬. ଉପରୋକ୍ତ କଥା ସମେତ ଖବର ପାଇଁ କିଛି ଖବରଦାତା ଡାଲମାରୁ ଚମ୍ପେଇନେଉଳ, ଭାତରୁ ଝିଟିପିଟି ଓ ପୋକ ଖୋଜିବାରେ ବ୍ୟସ୍ତ ରହି ପାରନ୍ତି ।
୭. ଏହି ଆହାର ସ୍କିମ୍ ଏକ ସରକାରୀ ଦୟା ବୋଲି ବିବେଚନା କରି ଚାଉଳ ଓ ଡାଲି ଯୋଗାଣକାରୀ ମହାଜନ ତାଙ୍କ ଗୋଦାମର ସବୁଠୁ ଖରାପ ବସ୍ତାଗୁଡ଼ିକ ଖଲାସ କରିଦେବେ । ପରିବାବିକାଳି ମହାଜନମାନେ ମଧ୍ୟ ଅଳ୍ପ ଷଢ଼ି ଯାଇଥିବା ବେଙ୍ଗାଲୁରୁ ମାଲ୍ ଖସେଇଦେବେ ।
୮. ରାଉରକେଲାରେ ଜୀବନଧାରଣ ମାନ ବେଶ୍ ଉଚ୍ଚରେ ଥିବାରୁ ଏହି ୫ଟଙ୍କିଆ ଭାତ ଡାଲମା କାର୍ଯ୍ୟକ୍ରମ ସେଠାରେ ଫେଲ୍ ମାରିବ । ରାଜ୍ୟର ସବୁଠୁ ମହଙ୍ଗା ଅଞ୍ଚଳ ହେଉଛି ରାଉରକେଲା-ସୁନ୍ଦରଗଡ଼ ଅଞ୍ଚଳ । ଯେଉଁଠି ବରା ଗୋଟାକୁ ୫ଟଙ୍କାରୁ ୧୦ ଟଙ୍କା ପର୍ଯ୍ୟନ୍ତ। ସବୁଠୁ ସୁଲଭ ଦରରେ ଖାଦ୍ୟ ମିଳୁଥିବା ବ୍ରହ୍ମପୁର ସହରରେ ବରା ଦାମ୍ ୧୦ ଟଙ୍କା ହେବାକୁ ହୁଏତ ଆହୁରି ୧୦ ବର୍ଷ ଲାଗିବ ।
୯. ରାଉରକେଲା ବ୍ୟତୀତ ଆଉ ସବୁ ପୌରନିଗମରେ ହୁଏତ ଦରିଦ୍ର ଲୋକେ ଧାଡ଼ି ଲଗାଇ ପାରନ୍ତି । କିନ୍ତୁ ଅନ୍ୟ ଏକ ସୂଚକକୁ ଲକ୍ଷ୍ୟ କଲେ, ଏହା ଗୋଟାପଣେ ପ୍ରତ୍ୟାଖ୍ୟାତ ହେବା ପରି ଲାଗୁଛି । ଭେଣ୍ଡିଂଜୋନ୍ ପରମ୍ପରା ଲାଗୁ ହେବା ପରେ ବସ୍ତିବାସୀଙ୍କ ଜୀବନଶୈଳୀ ବଦଳିଛି । ବିଶେଷତଃ ଖାଦ୍ୟପାନୀୟରେ ବି ସେମାନେ କିଛି ରୁଚି ଜାବୁଡ଼ି ଧରିଛନ୍ତି । ଆଜିକାଲି ଆଉ ବସ୍ତିବାସୀମାନେ ଟିଭି କେବୁଲ୍ରୁ ଆନାଲଗ୍ ସିଗ୍ନାଲ୍ ଚୋରି କରି ଟିଭି ଦେଖୁନାହାନ୍ତି, ବରଂ ବିଭିନ୍ନ ପେଡ଼୍ ଡିଟିଏଚ୍ରେ ମାସିକ ୪୫୦ ଟଙ୍କିଆ ପ୍ରିମିଅମ୍ ପ୍ୟାକ୍ରେ ସବୁ ଚ୍ୟାନେଲ୍ ଦେଖୁଛନ୍ତି । ତେଣୁ ଲାଗୁଛି ଏହି ଭାତ ଡାଲମା ସ୍କିମ୍ ଏକ ପ୍ରହସନରେ ପରିଣତ ହେବ ।
୧୦. ଡାଲମାରେ ବାଇଗଣ ପଡ଼ିଥିଲେ, ତାହା ପୂରା ବେକାର କରିଦେବ ସ୍ୱାଦକୁ । ତେଣୁ ରାନ୍ଧଣା ବିଶାରଦଙ୍କ ପରାମର୍ଶ ନିଆଯିବ କି ନାହିଁ, ତାହା ମଧ୍ୟ ଆଉ ଏକ ପ୍ରଶ୍ନ ।
୧୧. କେନ୍ଦ୍ର ସରକାରଙ୍କ ପରି ରାଜ୍ୟ ସରକାର ମଧ୍ୟ ପେସାଦାର ଶୈଳୀରେ ଏକ ସୁଦୀର୍ଘ ମାର୍ଗଦର୍ଶିକା ଜାରି କରିବା ବହୁତ ଭଲ ହେବ । ସେଥିରେ ମାରୱାଡ଼ି ବାସା, ପଞ୍ଜାବୀ ଢାବା ବା ସାଉଥ୍ ଇଣ୍ଡିଆନ୍ ଭୋଜନାଳୟ ତତ୍ତ୍ୱକୁ ଧ୍ୟାନ ଦେବା ନିହାତି ଦରକାର ବୋଲି ଆମ୍ଭେ ଅନୁମାନ କରୁଛୁ ।
୧୨. ଆଚାର ଟିକେ ନହେଲେ କ’ଣ ଏତେ ବଡ଼ ଖରାଦିନରେ ବଗଡ଼ା ଭାତ ତଣ୍ଟିରେ ଗଳିବ? ଆଚାର ପ୍ରାୟୋଜକ କିଏ ହେଉଛନ୍ତି, ଦେଖିବାକୁ ରହିଲା ।
ବିମଳପ୍ରସାଦ, ୯୯୩୭୩୫୩୨୯୩
ମନ୍ତବ୍ୟଗୁଡିକ