ଭୁବନେଶ୍ୱର-କଟକ ମେଟ୍ରୋ ରେଳର ଇନ୍ଦ୍ରଜାଲ!
୨୦୧୪ ଅଗଷ୍ଟ ୨୨ ତାରିଖରେ ଓଡ଼ିଶା ପ୍ରଶାସନ ଏକ ବଡ଼ ନିଷ୍ପତ୍ତି ନେଇଛି । ଯାହାକୁ ଗଣମାଧ୍ୟମ ଖୁସି ଖବର ବୋଲି ବର୍ଣନା କରିଛି। ତାହା ହେଉଛି କଟକ-ଭୁବନେଶ୍ୱର ମଧ୍ୟରେ
ମେଟ୍ରୋ ଟ୍ରେନ୍ ଚଳାଚଳ। ସେହି ପରିପ୍ରେକ୍ଷୀରେ ଆମ୍ଭେ ଜନସାଧାରଣଙ୍କୁ କିଛି ସୂଚନା
ଦେବା ସହ ସତର୍କ କରାଇ ଦେବାକୁ ଇଚ୍ଛା କରିଛୁ...
- ଓଡ଼ିଶା ଗଣମାଧ୍ୟମ ଏବେ ଅତୀତକୁ ରୋମନ୍ଥନ କରିବାରେ ବ୍ୟସ୍ତ ଥିବା ବେଳେ ଭବିଷ୍ୟତକୁ ଆଦୌ ଦେଖୁୁ ନାହିଁ । ଏଣେ ଗୋଟିଏ ଦକ୍ଷିଣୀ କମ୍ପାନୀ ସହ ବୁଝାମଣା ସ୍ଵାକ୍ଷରିତ ହୋଇଛି ଏବଂ ସେହି କମ୍ପାନୀର ଅଭିଜ୍ଞତା କ'ଣ କାହାକୁ ଜଣା ନାହିଁ । ତେବେ ଡିପିଆର୍ ବା ସବିଶେଷ ପ୍ରକଳ୍ପ ବିବରଣୀ ପ୍ରସ୍ତୁତ କରି ସେହି କମ୍ପାନୀ ଅଢ଼େଇ କୋଟି ଟଙ୍କା ପ୍ରଥମେ ନେଇଯିବ ।
- ସବୁଠୁ ଆଶ୍ଚର୍ଯ୍ୟର କଥା ଯେ ଡିପିଆର ନହେଉଣୁ ଆକଳନ ୨୨୫୦କୋଟି ବୋଲି ଘୋଷଣା ସରିଯାଇଛି । ଅର୍ଥାତ୍ ଆମ ଦେଶର ବଜେଟିଂ ଢଙ୍ଗ ଅନୁସାରେ ଏହି ଆକଳନ ରାଶି ବଢ଼ିବ ।
- ଏହା କେବେ କ୍ୟାବିନେଟ ମଂଜୁରୀ ପାଇଲା କିଏ ଜାଣିଛନ୍ତି କି?
- ପୁଣି ମାତ୍ର ୩୦ କିଲୋମିଟର ରେଳପଥ ପାଇଁ ଏତେ ପରିମାଣରେ ଟଙ୍କା ବ୍ୟୟ ହେବ !
- ମୁଖ୍ୟମନ୍ତ୍ରୀଙ୍କ ଘରୋଇ ସଚିବ ପାଣ୍ଡିଆନଙ୍କ ନିର୍ଦେଶରେ କାମ ନକରିବାକୁ ଯୁଗଳ ବାବୁ ଓଡ଼ିଶା ଛାଡ଼ି ସାରିଛନ୍ତି । ଏବେ ଦେଖିବାକୁ ରହିଲା, ପତି ବାବୁ ଏଡ଼ଜଷ୍ଟ କରିବେ କି କିଛି ଅନ୍ୟ ବାଟ ଧରିବେ?
- ସବୁ ଚଳୁ ହୋଇସାରିଲା ପରେ ଓଡ଼ିଶା ଗଣମାଧ୍ୟମ କେବଳ ପୋଷ୍ଟମର୍ଟମ କରି ହେଡ଼ଲାଇନ୍ ବନେଇବ । ତାହା ପୁଣି ସୂଚନା ଅଧିକାର କର୍ମୀଙ୍କ ପର୍ଦାଫାଶ ପରେ!
- କଟକ-ଭୁବନେଶ୍ୱରରେ ସାର୍କୁଲାର ରେଳପଥ କରିବା ପାଇଁ ଆମ୍ଭେ ରାଜ୍ୟର ଟାଉନ ପ୍ଲାନିଂ ଅଥରିଟିଙ୍କୁ ୨୦୦୬ ମସିହାରେ ଏକ ନିବନ୍ଧ ଦେଇଥିଲୁ । ପରବର୍ତୀ ସମୟରେ ଆଇଆଇଟି ଖଡ଼ଗପୁର ତାହାକୁ ଅନୁସରଣ କରିଥିଲେ - ଭୁବନେଶ୍ୱର ଭିଜନ ଡକୁମେଂଟ ନାମରେ । ତାହାକୁ ସମସ୍ତେ ଭୁଲିଗଲେଣି ।
- ଭାରତୀୟ ରେଳବାଇ ସହଯୋଗରେ ଓଡ଼ିଶା ସରକାର ନିଜେ ଏକ ରେଳବାଇ କମ୍ପାନୀ ଗଢ଼ି ଏହି କାମକୁ ଆଗକୁ ନେଇ ପାରିବେ । ଏଥିପାଇଁ କୌଣସି ଘରୋଇ କମ୍ପାନୀ ହାତରେ ପ୍ରସ୍ତାବିତ ପ୍ରକଳ୍ପକୁ ଟେକି ଦେବା ଅନାବଶ୍ୟକ । ପ୍ରକାରାନ୍ତରେ ଏହା ଏକ ଚଂଚକତା ।
- ନିର୍ଗୁଣ୍ଡି-କଟକ-ବାରଙ୍ଗ-ମେଣ୍ଢାଶାଳ-ଖୋର୍ଧା-ଜଟଣୀ-ଗଡ଼ମୋଟରୀ-ପିପିଲି-ବାଲିପାଟଣା-ହଂସପାଳ-ବାରଙ୍ଗକୁ ରେଳପଥରେ ଯୋଡ଼ିଲେ ଭୁବନେଶ୍ୱରର ଏକ ସାର୍କୁଲାର ରେଳପଥ ହୋଇପାରିବ । ଖୋର୍ଧା-ଜଟଣୀ ମଧ୍ୟରେ ଖୋର୍ଧା-ବଲାଙ୍ଗୀର ରେଳପଥ ଥିବାରୁ ସେହି ବାବଦରେ ଖର୍ଚ କମିଯିବ ।
- ଦୁଇ ବର୍ଷ ତଳେ ଆମ୍ଭେ ରେଳପଥରେ କୋଣାର୍କକୁ ଯୋଡ଼ିବା କଥା ଇ-ଗ୍ରୁପରେ ମନେ ପକାଇଥିଲୁ । କୋଣାର୍କ ହେଉଛି ଦେଶର ଏକମାତ୍ର ଗୁରୁତ୍ୱପୂର୍ଣ ପର୍ଯ୍ୟଟନ କ୍ଷେତ୍ର, ଯାହାକି ରେଳପଥ ସହ ସଂଯୁକ୍ତ ନୁହେଁ । ବାରଙ୍ଗ-ଫୁଲନଖରା-କାକଟପୁର-କୋଣାର୍କ-ପୁରୀ ରେଳସଂଯୋଗ ଦ୍ୱାରା ଓଡ଼ିଶାରେ ସହରୀକରଣ ଦ୍ରୁତତର ହେବ ।
- ଚର୍ଚିତ ଖବରରେ ପ୍ରକାଶ ପାଇଛି ମାସ୍ ରାପିଡ଼୍ ଟ୍ରାନଜିଟ୍ ସିଷ୍ଟମ(MRTS) ପାଇଁ ସରକାର ସିଦ୍ଧାନ୍ତ ନେଇଛନ୍ତି । କିନ୍ତୁ ଭୁବନେଶ୍ୱର ସହିତ ସକାଳ ଓ ସଂଧ୍ୟା ବ୍ୟତୀତ ଦିନ ବେଳେ ସଟଲ ବା ପାସେଞ୍ଜର ରେଳଗାଡ଼ିର ସୁବିଧା ନାହିଁ । ଅନୁଗୁଳ-ଢେଙ୍କାନାଳ-ଭୁବନେଶ୍ୱର-ଜଟଣୀ-ଖୋର୍ଧା ମଧ୍ୟରେ ୪ଯୋଡ଼ା ସଟଲ ଚାଲିଲେ ମାସ ଟ୍ରାନଜିଟ ସହଜ ହୋଇପାରିବ । ସେହିପରି ବାଲେଶ୍ୱର-ଭଦ୍ରକ-ବ୍ୟାସନଗର-କଟକ-ବାରଙ୍ଗ-ଭୁବନେଶ୍ୱର-ଜଟଣୀ-ଖୋର୍ଧା ଅଥବା ସ୍ଲିପ୍ ରୁଟ୍ ରେ ସାକ୍ଷୀଗୋପାଳ-ପୁରୀ ପର୍ଯ୍ୟନ୍ତ ଚାଲି ପାରିବ ।
- ଏଣେ କଟକ-ପୁରୀ ମଧ୍ୟରେ ଡବଲ ରେଳ ଟ୍ରାକ୍ ସରି ପାରୁ ନଥିବା ବେଳେ ବଡ଼ ବଡ଼ ସ୍ବପ୍ନ ଦେଖାଇ ରାଜ୍ୟର ରାଜକୋଷ ଲଣ୍ଡା କରିବାକୁ ଷଡଯନ୍ତ୍ର ଚାଲିଛି ।
ଆମ୍ଭ
ପାଖରେ ଆହୁରି ବହୁତ ଠୋସ୍ କଥା ଅଛି ବାଂଟିବାକୁ । ତେବେ ତାହା ଆପଣମାନଙ୍କ
ପ୍ରତିକ୍ରିୟା ପାଇବା ପରେ । ଜଟଣୀବାସୀ ବହୁବର୍ଷ ଧରି ଦାବି କରୁଛନ୍ତି ଖୋର୍ଧାରୋଡ଼
ଷ୍ଟେସନର ନାମ ବଦଳାଇ ଜଟଣୀ କରିବାକୁ । ଏଣେ ସ୍ଵୟଂ ଖୋର୍ଧା ସହର ମଧ୍ୟ ରେଳ
ମାନଚିତ୍ରରେ ସ୍ଥାନ ପାଇବାକୁ ଯାଉଛି । ତେଣେ କେନ୍ଦୁଝର ସହର, ରେଳ ମାନଚିତ୍ରରେ ସ୍ଥାନ
ପାଇ ସାରିଥିଲେ ସୁଦ୍ଧା ଯାଜପୁର-କେନ୍ଦୁଝର ରୋଡ଼ ନାମରେ ଷ୍ଟେସନ ରହିଛି । ଯାହାର ନାମ
କଳିଙ୍ଗନଗର ଅଥବା ବ୍ୟାସନଗର ହେବା କଥା ।
(ଏହା ପ୍ରଥମେ ୨୬ ଅଗଷ୍ଟ ୨୦୧୪ରେ ଫେସ୍ ବୁକ୍ ଓ ବିଭିନ୍ନ ଇ-ଗ୍ରୁପ୍ ରେ ପ୍ରକାଶ ପାଇଥିଲା । ସବୁଦିନିଆ ସଂରକ୍ଷଣ ପାଇଁ ଏବେ ବ୍ଲଗ୍ ରେ ପ୍ରକାଶ କଲୁ । ଆପଣଙ୍କର ପ୍ରତିକ୍ରିୟା ସ୍ଵାଗତଯୋଗ୍ୟ)
ମନ୍ତବ୍ୟଗୁଡିକ