ଆସୁ ହୁଡ୍-ହୁଡ୍ - ଡର କାହାକୁ

ବତାସ ହୁଡହୁଡ୍ - ପ୍ରଭାବ ଓ ପ୍ରତିକାର
୨୦୧୪ ଅକ୍ଟୋବର ୧୧ ତାରିଖରୁ ୧୪ ତାରିଖ (ଶନିବାରରୁ ମଙ୍ଗଳବାର) ପର୍ଯ୍ୟନ୍ତ ତଟବର୍ତୀ ଓଡ଼ିଶା ଓ ଆନ୍ଧ୍ରପ୍ରଦେଶରେ ସମ୍ଭାବ୍ୟ ବତାସ ହୁଡହୁଡ୍ ପରିପ୍ରେକ୍ଷୀରେ ଓଡ଼ିଶାର ସ୍ଥିତି ଉପରେ ଆମ୍ଭେ ଏଠାରେ ନିଜ ଅନୁଭବ ବଖାଣୁଛୁ:-

ତଟକା ତଥ୍ୟ ଅନୁସାରେ ୯୦ କିଲୋମିଟର ବେଗରେ ଉପକୂଳ ଓଡ଼ିଶାରେ ପବନ ବହିବ ଏବଂ ପ୍ରବଳ ବର୍ଷା ଲାଗି ରହିବ । ଫଳରେ ସବୁଠୁ ଆଗେ ପ୍ରଭାବିତ ହେବ ବିଦ୍ୟୁତ୍ ସରବରାହ ।
ବିଦ୍ୟୁତ ସରବରାହ ବିଚ୍ଛିନ୍ନ ହେବାରୁ ସହରାଂଚଳରେ ଗୁରୁତର ସମସ୍ୟା ଉପୁଜିବ । ଅନ୍ଧାର ହେବା ସହ ଓଭରହେଡ଼୍ ପାଣିଟାଙ୍କି ଉପରେ ନିର୍ଭରଶୀଳ ମଣିଷମାନେ କଷ୍ଟ ଭୋଗିବେ । ଯାହାର କୌଣସି ତୁରନ୍ତ ବିକଳ୍ପ ନାହିଁ । ତେବେ ଅନ୍ଧାର ସମସ୍ୟା ଦୂର କରିବାକୁ ଲୋକମାନେ କିଛି ମାତ୍ରାରେ ରିଚାର୍ଜେବଲ ଲାଇଟ୍, ଏଲଇଡି ଟର୍ଚ ଓ ମହମବତୀ ଉପରେ ନିର୍ଭର କରିବେ ।
ଗ୍ରାମାଂଚଳରେ ଯଥେଷ୍ଟ କିରୋସିନି ମହଜୁଦ ଥିଲେ ହିଁ ଗ୍ରାମବାସୀମାନେ ଅନ୍ଧାର ସମସ୍ୟାରୁ ବର୍ତିଯିବେ ।
ବିଜୁଳି କଟିଯିବାରୁ ଗ୍ରାମାଂଚଳରେ ମୋବାଇଲ୍ ଟେଲିକମ୍ ଟାୱାରଗୁଡ଼ିକ ଅଚଳ ହୋଇଯିବ । ମୁଖ୍ୟତଃ ବି.ଏସ୍.ଏନ୍.ଏଲ୍. ସେବା ଠପ୍ ହୋଇଯିବ । ଘରୋଇ ଟେଲିକମ୍ କମ୍ପାନୀର ଗାଆଁ ଟାୱାରଗୁଡ଼ିକରେ ବ୍ୟାକ୍ଅପ୍ ବ୍ୟାଟେରି ସହିତ କେତେକ ଜେନେରେଟର ସଚଳ ଥିବାରୁ, ହୁଏତ ଟେଲିକମ୍ ସେବା ଜାରି ରହିପାରେ । ଟାୱାର ଜଗିବା ଓ ରକ୍ଷଣାବେକ୍ଷଣ କାମ ସଂପୃକ୍ତ ଜମିମାଲିକମାନେ ରଖିଥିବା ସ୍ଥଳେ, ଜେନେରେଟର ପାଇଁ ଉଦ୍ଦିଷ୍ଟ ପେଟ୍ରୋଲ/ଡିଜେଲକୁ ସେମାନେ ବିକି ଦେଉଥିବାରୁ ନିରନ୍ତର ଟେଲିକମ୍ ସେବା ସମ୍ଭବ ହେଉ ନାହିଁ ।
ବିଜୁଳି ସଂକଟରୁ ରକ୍ଷା ପାଇବା ପାଇଁ ଲୋକମାନେ ପାୱାରବ୍ୟାଙ୍କ୍, ଇନଭର୍ଟର, ଜେନେରେଟର ଉପରେ ନିର୍ଭରଶୀଳ ହେବେ । ମଧ୍ୟମ ବର୍ଗର ଲୋକମାନେ ପୋର୍ଟେବଲ ଜେନ୍ ସେଟ୍ ଓ ପାୱାରବ୍ୟାଙ୍କ୍ କିଣି ପକାଇବେ ।
ଲଗାଣ ବର୍ଷା ସାଙ୍ଗକୁ ପବନ ବହିବାରୁ ମାଟିକାନ୍ଥଗୁଡ଼ିକ ଭାଙ୍ଗିପଡ଼ିବାର ଆଶଙ୍କା ରହିଛି । ଉପକୂଳ ଓଡ଼ିଶାରେ ମାଟିକାନ୍ଥ ଥିବା ଘର ଆଦୌ ନରଖିବା ପାଇଁ ମହାବାତ୍ୟା ପରେ ଏବଂ ଫାଇଲିନ୍ ପରେ ଆମ୍ଭେ ପରାମର୍ଶ ଦେଇଥିଲୁ । କିନ୍ତୁ ପ୍ରଶାସନ ତଥାପି ଚେତି ନାହାନ୍ତି ।
କେଉଁ କେଉଁ ପରିବାରଗୁଡ଼ିକ ମାଟିକାନ୍ଥ ଘର ଉପରେ ଗୋଟାପଣେ ନିର୍ଭରଶୀଳ, ସେଭଳି କିଛି ଡାଟାବେସ୍ ପ୍ରଶାସନ ପାଖରେ ନାହିଁ । ତେଣୁ ନିରାପଦ ସ୍ଥାନକୁ ସ୍ଥାନାନ୍ତର ପାଇଁ ଶାସନକଳ ହଡ଼ବଡ଼ ହେବ ।
ଟେଲି ଯୋଗାଯୋଗ ବିଚ୍ଛିନ୍ନ ହେବାରୁ ସାଟେଲାଇଟ୍ ଫୋନ୍ ହିଁ ସାହାଭରସା ପାଲଟିଯିବ । ସେତେବେଳେ ସଠିକ୍ ରିପୋଟ ଓ ସୂଚନା ଦେଣନେଣ ଜରୁରୀ ହୋଇ ପଡ଼ିବ ।
ବିଜୁଳି ବିଭ୍ରାଟ କାରଣରୁ ଟେଲିଭିଜନ ଦେଖିବା ସମ୍ଭବ ହେବ ନାହିଁ । ତେବେ ଟାଟାସ୍କାଏ, ଏଆରଟେଲ୍, ଡିସ୍ ଟିଭି ଓ ଭିଡ଼ିଓକନ୍ ଡିଟିଏଚ୍ ସେବା ଅଧୀନରେ ସ୍ମାର୍ଟଫୋନ୍ ବ୍ୟବହାରକାରୀ ମୋବାଇଲ୍-ଟିଭି ଗ୍ରାହକମାନେ ଇଟିଭି(ଓଡ଼ିଆ) ଓ ଓଟିଭି ଉପରେ ନିର୍ଭରଶୀଳ ହେବେ । MBC ଟିଭି ମୋବାଇଲ୍ ଆପ୍ ମଧ୍ୟ ଅନେକ ଉପଭୋକ୍ତାଙ୍କୁ ସହାୟକ ହେବ । ଅନ୍ୟଥା ହିନ୍ଦୀ ନ୍ୟୁଜ୍ ଚ୍ୟାନେଲଗୁଡ଼ିକରୁ ଲୋକମାନେ ସୂଚନା ପାଇପାରିବେ ।
ତଳିଆ ଅଂଚଳରେ, ବିଶେଷତଃ ସହରର ଖାଲୁଆ ଅଂଚଳର ବାସିନ୍ଦାମାନେ ନିଜନିଜ ମୋଟରଗାଡ଼ିଗୁଡ଼ିକୁ ସୁରକ୍ଷିତ ରଖିବା ପାଇଁ ଉଚ୍ଚ ସ୍ଥାନରେ ଥିବା ନିଜନିଜ ପ୍ରିୟପରିଜନଙ୍କ ଘର ଉପରେ ନିର୍ଭରଶୀଳ ହେବେ । ଅନ୍ୟଥା ପୂରା ଇଂଜିନ୍ ଖୋଲି ପାଣି ସଫା କରିବା ଇତ୍ୟାଦି ପାଇଁ କେତେ ଶହରୁ କେତେ ହଜାର ପର୍ଯନ୍ତ ଟଙ୍କା ଖର୍ଚ କରିବାକୁ ପଡ଼ିବ ।
ବଜାରରେ ଆଳୁ, ପରିବା ସମେତ ଚୁଡ଼ା, ଗୁଡ଼, ମହମବତୀ, ଅଣ୍ଡା ଦର ବଢ଼ିଯିବ । ଏହା ଉପରେ ପ୍ରଶାସନ କିଛି ପଦକ୍ଷେପ ନେବା ଦରକାର ।
ଯୋଗାଯୋଗ କ୍ଷେତ୍ରରେ ସବୁଠୁ ବଡ଼ ସମସ୍ୟା ହେବ, ରାସ୍ତା ଉପରେ ଉପଡ଼ି ପଡ଼ିଥିବା ବା ଶୋଇ ଯାଇଥିବା ଗଛ । କେବଳ ଦିନବେଳେ ଓ ଶୁଖିଲା ପାଗରେ ଗଛ କାଟିବାକୁ ହିଁ ଖାକିବାଲା ସରକାରୀ କର୍ମୀମାନେ ମନ ବଳାଇବେ । ଫଳରେ ଘଂଟା ଘଂଟା ଧରି ରାସ୍ତା ଅବରୋଧ ରହିବ । କେବଳ ୨ ଜଣ ଲେଖାଏଁ ଓଡ଼୍ରାଫ୍ କର୍ମୀ ସେହି ଗଛ କାଟିବା ପାଇଁ ଯନ୍ତ୍ର ଧରିବା ସହ ସ୍ଥାନୀୟ ଗ୍ରାମବାସୀମାନଙ୍କ ସହଭାଗିତାରେ ସେଗୁଡ଼ିକୁ ରାସ୍ତାରୁ ହଟାଇବାର ବ୍ୟବସ୍ଥା ହେବା ଦରକାର ।
ଓଜନିଆ ଓ ମୋଟା ଗଛ ବ୍ୟତୀତ ଅନ୍ୟ କଠିନ ଆବର୍ଜନା ସବୁ ରାସ୍ତାରୁ ହଟାଇଲେ ହିଁ ରାସ୍ତାଗୁଡ଼ିକ ଯାତାୟତ ଉପଯୋଗୀ ହୋଇପାରିବ । ବ୍ୟବହାର ଉପଯୋଗୀ କରାଯାଉଥିବା ରାସ୍ତାଗୁଡ଼ିକ ସଂକ୍ରାନ୍ତ ସୂଚନା ବିଭିନ୍ନ ଗଣମାଧ୍ୟମରେ ପ୍ରଚାର ହେବା ଦରକାର ।
ଫାଇଲିନ୍ ବିପର୍ଯ୍ୟୟର ବର୍ଷେ ପରେ ମଧ୍ୟ ଗଂଜାମ ଜିଲ୍ଲାରେ କ୍ଷତିଭରଣା କାର୍ଯ୍ୟ ଓ ପ୍ରତିକାର ବ୍ୟବସ୍ଥା କରା ନଯିବା ବା ନଯାଇପାରିବା, ଘୋର ଲଜ୍ଜାଜନକ । ଅନ୍ତତଃ ବତାସ ହୁଡହୁଡ୍ ପରେ କ୍ଷତିପୂରଣ କାର୍ଯ୍ୟକଳାପ ତ୍ୱରାନ୍ୱିତ ଓ ସମୟବଦ୍ଧ ହେବା ଜରୁରୀ ।